⚡️15-aprel — «Mádeniyat hám kórkem óner xızmetkerleri kúni»

Qádirli mádeniyat hám kórkem óner tarawınıń pidayıları! Jankúyer ustazlar, talantlı jaslar!

Óz xalqı, milletiniń abıroyı ushın bar talantı  menen xalqımızǵa ayanbay xızmet etip, adamlarǵa quwanısh hám jaqsı keypiyat baǵıshlap, insanlar qálbine jaqsılıq, mehir-muhabbat, shúkirshilik sezimlerin oyatatuǵın siz ázizlerdi kásiplik bayramıńız ― 15-aprel―Mádeniyat hám kórkem óner tarawı xızmetkerleri kúni menen qızǵın qutlıqlaymız.

Húrmetli Prezidentimizdiń ayrıqsha itibarı hám ǵamqorlıǵı nátiyjesinde respublikamızda keń túrde belgilenip atırǵan Mádeniyat hám kórkem óner tarawı xızmetkerleri kúni tarawda miynet etip atırǵan hár bir insandı ruwhlandırıp qoymay, mámleketimizde mádeniyat, kórkem óner tarawında ámelge asırılıp atırǵan rawajlanıwlardı, jańalanıw hám ózgerislerdi óz dóretiwshiliginde sáwlelendiriwde ilham-yosh baǵıshlaydı.

Sońǵı jılları mádeniyat hám kórkem óner tarawında úlken ózgerisler júz bermekte. Tarawdıń materiallıq- texnikalıq bazası bekkemlenip, taraw xızmetkerlerin hár tárepleme qollap-quwatlaw baǵdarında bir qatar iygilikli isler ámelge asırılmaqta. Óz kásibiniń sheberleri hám jas talant iyeleri xalıqaralıq festivallarda múnásip qatnasıp, tabıslarǵa bólenbekte.
Insan qádiri ulıǵlanǵan jurtımızdaǵı búgingi ámelge asırılıp atırǵan reformalar óz náwbetinde biziń mádeniyat hám kórkem óner tarawları aldına úlken wazıypa qoyıp, juwapkershilik júklemekte. Álbette, biz bul úlken isenimdi juwapkershilik penen aqlap, milliy kórkem ónerimiz benen mádeniyatımızdı rawajlandırıwda at salısamız.

Qádirli kásiplesler! Bársheńizdi jáne bir márte kásiplik bayramıńız benen qutlıqlap, bekkem densawlıq, shańaraqlarıńızǵa amanlıq, talantıńız benen dúnyanı tańlandırıwday iygilikli islerińizde bálent párwazlar tileymiz.

Begisbay Temirbaev,
Qaraqalpaqstan Respublikası Mádeniyat ministri

Ministrliktiń málimleme xızmeti