(Qaraqalpaq) Xızmet saparı

Ózbekstan Respublikası Mádeniyat ministriniń birinshi orınbasarı Avazxon Tadjixanov xızmet saparı menen Nókis qalasında bolıp turıptı.
A.Tadjixanov Qaraqalpaqstan Respublikası Mádeniyat ministri B.Temirbaev penen birgelikte Nókis qalasında jumıs alıp barıp atırǵan mámleketlik teatrlardıń jumısın jetilistiriw, teatrlarǵa jańa innovaciyalıq texnologiyalardı engiziw, sonday-aq, saxnalıq shıǵarmalardıń kórkemlik dárejesin arttırıw máseleleri boyınsha Berdaq atındaǵı Qaraqalpaq mámleketlik akademiyalıq muzıkalı teatrı hám Qaraqalpaq mámleketlik Jas tamashagóyler teatrınıń jumısı menen jaqınnan tanıstı.
Sonday-aq, Mádeniyat ministrligi janındaǵı Kórkemlik keńes aǵzaları menen birgelikte akademiyalıq teatrda Q.Narqabıldıń «Tereklerdiń muńlı qosıǵı,» Jas tamashagóyler teatrında S.Kubaev, P.Belkovtıń «Iyt bolǵım kelmeydi,» S.Davlatmuratovtıń «Baylıqtıń ruwxıy nızamları» kitabı tiykarında B.Aytmuratov inscenirovkası tiykarında saxnalastırılǵan «Aydıń on besi jaqtı» spektakllerin kórkemlik keńesten ótkerdi.

Ministrliktiń málimleme xızmeti