БИРГЕ ИСЛЕСИЎДИ КЕӉЕЙТИЎ БАҒДАРЫНДА

Мәлим еткенимиздей,  ҳәзирги ўақытта  республикамыздыӊ  делегация ағзалары Татарстанда болып турыпты.

Бүгин Татарстан Республикасы Мәденият министрлигинде ϴзбекстан Республикасыныӊ Казандағы бас консулы Н.Косимов, бас консульдыӊ биринши хаткери К.Давронов, Қарақалпақстан Республикасы Министрлер Кеӊеси Баслығыныӊ орынбасары Р.Зарикеев, Қарақалпақстан Республикасы Мәденият министри Б.Темирбаев, ϴзбекстан мәмлекетлик филармониясы директоры А.Тожибоев, Татарстан Рсеупбликасы Мәденият министри И.Аюпова, министр орынбасары Д.Натфуллин, министрдиӊ халықаралық байланыслар бойынша орынбасары В.Даутова, Татарстан илимлер академиясы кандидаты А.Файзрахмановалар қатнасыўында рәсмий ушырасыў болып өтти.
Ушырасыўда еки тәреп ўәкиллери өз-ара бирге ислесиў, әсиресе, еллеримиз арасындағы мәдений байланысларды беккемлеў, туризмди раўажландырыў, өз-ара тәжирийбе алмасыў ҳәм алдағы ўақытта усы бағдарларда кеӊ көлемли жумысларды әмелге асырыў бойынша сөйлесиўлер алып барды.Сондай-ақ, бир неше жыллардан берли мәмлекетимиз бойлап өткерилип киятырған «Үш әўлад» ушырасыўларын Татарстанда да шөлкемлестириўде бирге ислесиўди жолға қойыў бойынша пикир-усыныслар билдирилди.

Мағлыўмат ушын, бүгин Казан қаласында «Казанда Шығыс базары» түркий ҳәм шығыс халықлардыӊ халықаралық фестивалыныӊ ашылыў мәресими болып өткерилип, онда Қарақалпақстан Республикасы Министрлер Кеңеси Баслығының орынбасары Р.Зарикеев сөзге шықты. Сондай-ақ,
фестивальдың ашылыў мәресимине бағышланған концерт бағдарламасында Қарақалпақстанға хызмет көрсеткен Башқуртстан халық артисти Б.Темирбаев ҳәм «Ниҳол» сыйлығы лауреаты А.Пиязовлар қатнасты. Ал, бүгинниң өзинде Казан қаласында қарақалпақстанлы өнермент ҳәм художниклердиң көргизбеси өз жумысын баслады.
Фестивальда дүньяның 50ге жақын мәмлекетлеринен дөретиўши жәмәәтлер қатнаспақта.

Министрликтиң мәлимлеме хызмети