“Еркин Қарақалпақстан”ның 100 жыллығы кең түрде белгиленди

Бүгин Қарақалпақ мәмлекетлик Жас тамашагөйлер театрында қарақалпақ баспасѳзиниң кѳш басы есапланған «Еркин Қарақалпақстан» газетасы шѳлкемлестирилгениниң 100 жыллығы мүнәсибети менен салтанатлы илаж өткерилди.

Онда Қарақалпақстан Республикасы Жоқарғы Кеңеси Баслығының орынбасары Р.Сапарбаев шығып сөйлеп, жыйналғанларды кең түрде белгиленип атырған юбилей сәнеси мүнәсибети менен қутлықлады.

1924-жылдың ноябрь айында дәслепки саны басылып шыққан «Еркин Қарақалпақстан» газетасы ѳткен дәўир ишинде жәмийетимиз турмысында өзиниң ылайықлы орнына ийе болды. Сондай-ақ, бул газета инсанлардың мәлимлемеге болған талабын қанаатландырыў менен бирге, бир әсирлик тарыйхы даўамында мәмлекетлик уйымлар менен халықты байланыстырыўшы көпир ўазыйпасын минсиз атқарды ҳәм бул әдиўли ўазыйпаны еледе атқарып келмекте.

Қарақалпақ журналистикасы ушын ѳзине жараса мектеп ўазыйпасын атқарған бул газета миллий журналистикамыздың раўажланыўына салмақлы үлес қосқан талантлы, қәлеми ысылған журналистлерди тәрбиялады. Газетаның мийнет қазанында қайнап, көплеген сиясий-жәмийетлик ғайраткерлер жетилисип шықты.

Қасым Әўезов, Сейфулғәбит Мәжитов, Тәмендер Сафиев, Қаллибек Бегжанов, Төлепберген Қайыпбергенов, Ибрайым Юсупов, Қуяш Юсупов, Шарап Уснатдинов, Елмурат Байназаров, Кеңесбай Каримов, Кеңесбай Реймов ҳәм басқа да талапшаң бас редакторлардың басшылығында газета халқымыздың руўхый дүньясын байытыўда салмақлы үлес қосып келди.

Торқалы той тойланып атырған бүгинги қутлы сәнеде өз кəсибине деген садықлығы, дөретиўшилик табыслары ҳәм тынымсыз излениўлери менен ажыралып киятырған бир қатар тараў пидайылары хошаметленип, ҳүрметли атақлар ҳәм көкирек белгилери менен сыйлықланды.

Илаж көркем өнер ҳәм мәденият хызметкерлери атқарыўындағы концерт бағдарламасы менен даўам етти.