«Давлат хавфсизлик хизмати кубоги» ғолиблари тақдирланди

Бугун Нукус шаҳрининг марказида ўрнатилган Ўзбекистон ва Қорақалпоғистон Республикаларининг давлат байроқлари ёнида «Давлат хавфсизлик хизмати кубоги» мусобақаларининг Қорақалпоғистон Республикаси босқичи ғолибларини тақдирлаш маросими бўлиб ўтди.

Унда Қорақалпоғистон Республикаси Жўқорғи Кенгесининг Раиси Аманбай Орынбаев сўзга чиқиб, кубок мусобақаларида ғолиб бўлган жамоалар ва спортчиларни бугунги ғалабаси билан табриклади.

Таъкидлаб ўтилганидек, сўнгги йилларда юртимизда барча соҳалар қаторида спортни ривожлантиришга қаратилаётган алоҳида эътибор ва ёшларга яратилиб берилаётган кенг имкониятлар бугунги кунда улар орасидан салоҳиятли, юртимиз равнақи йўлида муносиб ҳисса қўшадиган ва мамлакатимиз байроғини дунёга танитадиган спортчиларнинг етишиб чиқишига асос бўлмоқда.

Жорий йилда ўтказилган «Давлат хавфсизлик хизмати кубоги» мусобақалари шаҳар ва туманларимиздан бошлаб, олис ҳудудлардаги маҳаллаларга қадар кириб бориб, ўзида 40 мингдан ортиқ ёшларни қамраб олди.

Бугунги тақдирлаш маросимида қатор фаол ёшлар кубок, медаль ва қимматбаҳо совғалар билан тақдирланди.

Тантанали тадбир санъат ва маданият ходимлари ижросидаги концерт дастури билан давом этди.

Қарақалпақстан Республикасы Жоқарғы Кеңесиниң Мәлимлеме хызмети