ХОШ ХАБАР!
ДЕЛЕГАЦИЯМЫЗ БАШҚУРТСТАННЫҢ МӘМЛЕКЕТЛИК АТАҚЛАРЫ МЕНЕН СЫЙЛЫҚЛАНДЫ
Усы жылдың 22-24-август күнлери Башқуртстан Республикасында II халықаралық «Гүз романтикасы» классикалық музыка фестивалы болып өтти.
23-август күни фестиваль шеңберинде Қарақалпақстан Республикасы Мәденият министри,Қарақалпақстанға хызмет көрсеткен артист Бегис Темирбаев, Өзбекстан, Қарақалпақстан, Башқуртстан ҳәм Татарстан халық артисти Жеңисбек Пиязов, халықаралық таңлаўлардың жеңимпазлары Өтемис Жуманиязов, Маманбий Жумабаев ҳәм Хурсандбек Атамуратовлардан ибарат делегациямыз Башқуртстан Республикасы мәмлекетлик академиялық симфониялық оркестри менен биргеликте башқурт халқына миллий мәдениятымыз үлгилери жәмленген концерт бағдарламасын усынды.
Қуўанышлысы, фестивальда делегациямыз ағзалары Башқуртстан Республикасының мәмлекетлик атақлары менен сыйлықланды. Атап айтқанда, Қарақалпақстан Республикасына хызмет көрсеткен артист Бегис Темирбаев «Башқуртстан Республикасы халық артисти», Алишер Наўайы атындағы Үлкен академиялық театры солисти Өтемис Жуманиязов, жас талант ийелери Маманбий Жумабаев ҳәм Хурсандбек Атамуратовлар «Башқурстан Республикасына хызмет көрсеткен артист» ҳүрметли атақлары менен сыйлықланды. Өзбекстан, Қарақалпақстан, Башқуртстан ҳәм Татарстан халық артисти Жеңисбек Пиязовға Башқурстан Республикасы ҳүкиметиниң «Ҳүрмет жарлығы» тапсырылды.
Бул хош хабар әзелден туўысқан қарақалпақ ҳәм башқурт халықларының беккем дослығының айқын көриниси, Башқуртстан Республикасы менен ҳәр тәреплеме бирге ислесиў, социаллық-экономикалық, саўда-сатық, мәдений байланысларды күшейттириў бағдарында әмелге асырылып атырған кең көлемли жумыслардың нәтийжеси болып табылады.
