ДЕЛЕГАЦИЯМЫЗ ТҮРКСОЙ ШϴЛКЕМИ БАСШЫСЫ МЕНЕН УШЫРАСТЫ

Мәлим еткенимздей, республикамыздыӊ мәденият тараўы хызметкерлеринен ибарат делегация ағзалары ҳәзирде Истанбул қаласында болып турыпты.
Уллы шайыр Әжинияз Қосыбай улыныӊ 200 жыллығына бағышланған илажлар шеӊберинде Қарақалпақстан Республикасы Министрлер Кеӊеси Баслығыныӊ орынбасары Расул Зарикеев, ϴзбекстан Республикасы Мәденият министрлигиниӊ жуўаплы хызметкерлери Баҳрам Усманов, Ҳамроз Деҳқонов ҳәм Мәденият министри Бегис Темирбаевлар ТҮРКСОЙ түркий халықлар мәденият шөлкеми баслығы Султан Раев ҳәм Бакчилар беледиеси ҳәкимлиги менен ушырасты.
Ушырасыўда еки тәреп ўәкиллери өз-ара бирге ислесиў, мәдения, туризм тараўларында ири халықаралық жойбарларды әмелге асырыў бойынша сөйлесиўлер алып барды.

   
― Шөлкемимиздиӊ толық ҳуқықлы ағзасы болған ϴзбекстан менен көплеген тараўларда ири жойбарларды биргеликте әмелге асырылып киятырмыз. ТҮРКСОЙ тәрепинен ϴзбекстанныӊ Қарақалпақстан Республикасы менен дәслепки рет бирге ислесиўди жолға қойып, Истанбул қаласында тек ғана қарақалпақ халқыныӊ емес, бәлким, түркий халықлар руўхыйлығыныӊ жыршысы, уллы шайыр Әжинияз Қосыбай улыныӊ 200 жыллығын кеӊ түрде белгилеў бахтына миясар болмақтамыз,―деди ТҮРСОЙ баслығы Султан Раев.
    
ϴз нәўбетинде делегациямыз усындай абыройлы әнжуманды өткериўдеги әмелий жәрдеми ушын ТУРКСОЙ шөлкемине, Бакчилар беледиеси ҳәкимлигине, Истанбул университетине өз миннетдаршылық билдирди.
―Әлбетте, бул ТУРКСОЙ шөлкеми менен бирге ислесиўдеги дәслепки басқышы болып, алдағы ўақытта еллеримиз арасындағы мәдений ҳәм дослық қатнасықлардыӊ еле де беккемлениўине хызмет етиўине беккем исенемиз,―деди Расул Зарикеев.
Ушырасыўда алдағы режелер, өз-ар бирге ислесиў мәселелери бойынша пикир-усыныслар билдирилди.
Министрликтиӊ мәлимлеме хызмети